𝗕𝗔𝗟𝗜𝗔𝗡𝗚𝗔𝗢 𝗚𝗜-𝗟𝗨𝗦𝗔𝗗 𝗔𝗡𝗚 𝗧𝗢𝗨𝗥𝗜𝗦𝗠 𝗗𝗘𝗩𝗘𝗟𝗢𝗣𝗠𝗘𝗡𝗧 𝗣𝗟𝗔𝗡; 𝟴 𝗞𝗔 𝗧𝗢𝗨𝗥𝗜𝗦𝗠 𝗗𝗜𝗦𝗧𝗥𝗜𝗖𝗧𝗦 𝗚𝗜𝗣𝗔𝗜𝗟𝗔

 

Opisyal nga gilunsad ug gipirmahan sa Lokal nga Pangagamhanan sa Baliangao ang "One Sweet Asenso Baliangao" Municipal Tourism Development Plan, usa ka komprehensibong plano nga nagtumong sa pagpalambo sa turismo, paghatag og dugang panginabuhian, ug pagpreserbar sa natural ug kulturanhong bahandi sa lungsod.

Gipasiugda ni Mayor Golda Catherine June Yap-Resma nga ang maong plano dili lamang usa ka dokumento kondili simbolo sa panaghiusa sa gobyerno, pribadong sektor ug katawhan aron mapadayon ang malungtarong kalamboan sa Baliangao.

Matud sa mayor, ang Tourism Development Plan nahisubay sa 5Ms Development Thrust sa Team Asenso ubos sa pagpangulo ni Gov Henry Oaminal nga padayon nga naghatag og suporta ug pag-abag sa mga proyekto sa turismo ug kalamboan sa Baliangao.

Usa sa labing dakong bahin sa plano mao ang pagtukod sa walo ka Tourism Districts, nga naglangkob sa White Sand Beaches, Baliangao Boulevard, Cliff View Area hangtod Tamban Cove, Cabgan Island, U-River Peak, Water Sports and Recreation, Baliangao Protected Landscape and Seascape, ug History and Heritage Tourism.

Gipasabot usab ni Mayor Yap-Resma nga ang mga tourism districts pagahiusahon pinaagi sa mga walkable tourism corridors aron mas sayon nga masuroyan sa mga turista ang nagkalain-laing destinasyon, nga maghatag usab og dugang oportunidad sa panginabuhian ug pagpalambo sa lokal nga ekonomiya.

Lakip sa mga prayoridad sa plano ang pagpaayo sa access roads, comfort rooms, parking areas, street lighting, tourism signages, waste management facilities, landscaping ug uban pang tourism amenities aron mas mapalambo ang kasinatian sa mga bisita.

Gibutyag usab nga nakagahin og ₱40 milyon nga pondo alang sa pagpalambo sa Tamban Cove o Public Beach, samtang padayon usab ang pagpalambo sa Cabgan Island, nga nailhan isip "Little Boracay" sa Misamis Occidental.

Gipaambit usab ni Mayor Yap-Resma ang mga leksyon gikan sa tourism benchmarking sa Siquijor, diin iyang gipasiugda ang importansya sa lig-on nga mga polisiya ug ordinansa aron mapanalipdan ang kinaiyahan ug masiguro ang malungtarong pag-uswag sa turismo sa Baliangao.

Gilauman sa lokal nga panggamhanan nga pinaagi sa nagkahiusang suporta ni Governor Henry Sevilla Oaminal, Congressman Jason P. Almonte, Congressman Sancho Fernando "Ando" Oaminal, ug Asenso Pinoy Party-list Representative Atty. Indy Oaminal, mahimong usa ang Baliangao sa mga nag-unang sustainable tourism destinations sa Misamis Occidental ug sa tibuok Northern Mindanao.///