𝗣𝗣𝗔 𝗢𝗭𝗔𝗠𝗜𝗭 𝗡𝗔𝗚𝗛𝗔𝗥𝗜 𝗦𝗔 𝗔𝗦𝗘𝗡𝗦𝗢 𝗢𝗭𝗔𝗠𝗜𝗭 𝗧𝗥𝗜𝗩𝗜𝗔 𝗡𝗜𝗚𝗛𝗧, 𝗠𝗜𝗗𝗔𝗟𝗔 𝗦𝗔 ₱𝟯𝟱,𝟬𝟬𝟬 𝗡𝗚𝗔 𝗚𝗥𝗔𝗡𝗗 𝗣𝗥𝗜𝗭𝗘

 

Gipamatud-an sa Philippine Ports Authority (PPA) Ozamiz ang ilang kahibalo ug kahusayan sa trivia competition human nilang makab-ot ang kampeonato sa Asenso Ozamiz Trivia Night, nga kabahin sa selebrasyon sa 78th City Charter Anniversary sa Ozamiz City ug Fiesta sa Birhen sa Cotta.

Sa finals, Gipildi sa PPA Ozamiz ang 11 ka ubang lig-on nga mga koponan pinaagi sa pagtipig og 70 puntos, nga naghatag kanila sa titulo isip Champion ug ₱35,000 nga cash prize.

Nakuha sa La Salle University (LSU) Team A ang 2nd Place human makatigom og 52 puntos, nga nag-angkon og ₱25,000 cash prize, samtang ang Trivia Warriors maoy miplastar sa 3rd Place uban sa 47 puntos ug ₱15,000 cash prize.

Labing mainiton ang panag-indigay sa finals diin mitambong ang PPA, Medina-A, LSU-A, LSU-B, Tangub City Global College (TCGC), Civil Aviation Authority of the Philippines (CAAP), Philippine Statistics Authority (PSA), Department of Education (DepEd), Quiz Me Maybe Squad, PORA, Trivia Warriors, ug Quiz Bees. Gipakita sa matag koponan ang ilang lawom nga kahibalo sa kasaysayan, kultura, panghitabo ug nagkalain-laing natad sa impormasyon.

Nahimong usa ka sentro sa intelektuwal nga kompetisyon ang maong kalihokan, diin gisulayan dili lamang ang memorya sa mga partisipante kondili usab ang ilang kritikal nga panghunahuna, paspas nga pagtubag ug epektibong teamwork.

Ang Asenso Ozamiz Trivia Night usa sa mga kalihokang gipasiugdahan sa Kanunay Asenso Ozamiz Administration ubos sa pagpangulo ni Mayor Sam Norman Go Fuentes isip kabahin sa pagsaulog sa ika-78 nga Charter Anniversary sa Dakbayan sa Ozamiz ug Fiesta sa Birhen sa Cotta.

Mas nahimong madasigon ang maong kompetisyon tungod sa suporta nila Governor Henry S. Oaminal, 2nd District Congressman Ando Oaminal, ug Asenso Pinoy Party-list Representative Indy Oaminal, ilabina sa pagdugang sa kantidad sa mga papremyo nga nakahatag og dugang inspirasyon sa tanang mga partisipante.///