OZAMIZ AIRPORT MODERNIZATION PROJECT

Laing dakong lakang sa pagpalambo sa turismo ug ekonomiya sa Misamis Occidental ang gipadayag ni Governor Henry S. Oaminal human niyang ipahibalo nga gilauman nga masugdan na sa sunod bulan ang procurement alang sa bag-ong passenger terminal building sa Ozamiz Airport.

Ang maong proyekto kabahin sa dugay nang pangandoy sa probinsya nga himuong moderno ang tugpahanan aron sa umaabot makahimo kini sa pagserbisyo sa international flights. Sa iyang pamahayag, gipasabot ni Oaminal nga ang pagpalambo sa Ozamiz Airport usa sa mga importanteng lakang aron mapadayon ang kusog nga pag-uswag sa turismo sa probinsya. "Kinahanglan nga ma-modernize nato ang airport aron makaabot kini sa standard nga makahimo sa pag-accommodate sa international flights," matud sa gobernador. Gisaysay usab niya nga adunay mga foreign investors, ilabina gikan sa Korea, nga nagpakita na og interes sa pagpalambo sa usa ka golf course nga nahimutang duol sa Asenso Misamis Occidental Recreation and Adventure Park (AMORAP) sa Sinacaban. Apan usa sa ilang dakong konsiderasyon mao ang kahimtang sa Ozamiz Airport. "Usa sa ilang concerns mao ang airport development. Gikinahanglan pa nato ang expansion sa runway tungod kay kulang pa kita og 300 metros aron makalanding ang dagkong international aircraft," dugang pa niya. Bisan pa sa maong hagit, mipadayag si Oaminal nga padayon ang ilang paningkamot uban ni Misamis Occidental Second District Congressman Ando Oaminal ug Asenso Pinoy Party-list Representative Indy Oaminal aron makaseguro sa pondo gikan sa nasyonal nga gobyerno. Matud niya, mokabat sa P2 bilyon ang gikinahanglang pondo alang sa airport modernization project. Sa pagkakaron, nakaseguro na ang probinsya og P800 milyon, samtang gipaningkamotan pa ang nahibiling P1.2 bilyon. Gikatakda usab sa umaabot nga semana ang usa ka miting uban sa Civil Aviation Authority of the Philippines (CAAP) ug Department of Transportation (DOTr) aron pinal nga maplantsa ang nahibiling pondo ug mga detalye sa proyekto. Gilauman sa provincial government nga mahimong operasyonal ang gipalapad ug gi-modernisang Ozamiz Airport sa unang quarter sa 2028.///