₱𝟴𝟬𝟬-𝗠 𝗡𝗚𝗔 𝗠𝗢𝗗𝗘𝗥𝗡𝗢𝗡𝗚 𝗛𝗘𝗔𝗟𝗧𝗛𝗖𝗔𝗥𝗘 𝗙𝗔𝗖𝗜𝗟𝗜𝗧𝗜𝗘𝗦 𝗦𝗔 𝗡𝗠𝗠𝗖, 𝗚𝗜-𝗜𝗡𝗔𝗚𝗨𝗥𝗔𝗛𝗔𝗡

Opisyal nang gi-inagurahan sa Northern Mindanao Medical Center (NMMC) ang tulo ka bag-ong landmark healthcare facilities nga nagkantidad og ₱800 milyon atol sa seremonya niadtong Lunes, Hulyo 13, 2026.

Lakip sa gi-ablihan ang unang Voice Command ug AI-Assisted Cardiac Catheterization Laboratory sa Mindanao, nga nahimutang sa ikaduhang andana sa Hearts, Lungs, and Kidney Building. Giablihan usab ang unang Bone Bank sa Visayas ug Mindanao, nga nahimutang sa ikaduhang andana sa New Hospital Building.

Giinagurahan usab ang unang PET/CT Scan Center sa Northern Mindanao, nga nahimutang sa Ground Floor sa Oncology Building, aron mas mapalapdan ang serbisyo sa pag-diagnose ug pagtambal sa mga pasyenteng adunay kanser.

Gitambongan ang inagurasyon sa mga opisyal sa Department of Health (DOH), mga lokal nga opisyal sa kagamhanan, ug gipanalanginan sa tulo ka mga pari ang maong mga pasilidad.

Pinaagi sa maong modernong pasilidad, dili na kinahanglan nga mobiyahe pa sa Metro Manila o sa gawas sa nasud ang mga pasyente sa Northern Mindanao ug kasikbit nga mga rehiyon aron makadawat og espesyal ug komplikadong pagtambal alang sa sakit sa kasingkasing, bukog, ug kanser.