ARCHBISHOP JUMOAD NAGHANGYO OG PAG-AMPO ALANG SA MGA KAPARIAN NGA NAG-ANNUAL RETREAT

 

Nanawagan si Most Rev. Martin S. Jumoad, D.D., Arsobispo sa Roman Catholic Archdiocese of Ozamis, sa tanang mga magtutuo nga padayon nga iampo ang mga kaparian nga mitambong sa ilang Annual Clergy Retreat nga nagsugod karong adlawa ug molungtad hangtod Hulyo 28, 2026 sa Tagaytay City.

Sumala ni Archbishop Jumoad, ang retreat usa ka mahinungdanong higayon sa espirituhanong pagpamalandong, pag-ampo, ug pagbag-o sa ilang bokasyon aron mas mapalig-on ang ilang pagtuo ug dedikasyon sa pag-alagad sa Simbahan ug sa katawhan.

Gipasabot usab sa Arsobispo nga pinaagi sa maong retreat, gilauman nga mobalik ang mga kaparian nga adunay bag-ong kusog, inspirasyon, ug mas lawom nga pagpanaw sa ilang pastoral nga misyon isip mga magbalantay sa pagtuo.

Naghangyo usab siya sa mga magtutuo nga ipadayon ang pag-ampo aron mamunga ang maong espirituhanong pagpangandam ug mahimong tinubdan sa mas mabungahong ministeryo alang sa Archdiocese of Ozamis ug sa tanang lugar nga ilang gialagaran.///