HALOS 900 KA MGA TINUN-AN NAKABENEPISYO SA SCHOOL-BASED FEEDING PROGRAM KICK-OFF SA OZAMIZ

 

Opisyal nang gilunsad sa Ozamiz City Central School pinaagi sa School Division Office of Ozamiz ang Kick-Off Activity sa School-Based Feeding Program (SBFP) alang sa School Year 2026–2027, diin mokabat sa kapin 900 ka mga tinun-an ang unang nakabenepisyo sa maong programa nga gitumong sa pagpalambo sa kahimsog ug nutrisyon sa mga kabataan.

Ang maong kalihokan lig-on nga gisuportahan sa Kanunay Asenso Ozamiz Administration ubos sa liderato ni Mayor Sam Norman Go Fuentes. Mitambong usab si City Councilor Cecile Co, Chairperson sa Committee on Education sa Sangguniang Panlungsod, nga mipadayag nga ang administrasyon ni Mayor Sam magpadayon sa pag-abag ug pagpalig-on sa mga programa sa Schools Division of Ozamiz City nga naghatag og kaayohan sa mga estudyante.

Ubos sa School-Based Feeding Program, ang tanang Kindergarten ug Grade 1 learners sa mga pampublikong eskwelahan makadawat og adlaw-adlaw nga init ug masustansiyang pagkaon sulod sa 82 days, lakip na ang feeding period aron mapugngan ang pagkawala sa timbang ug malnutrisyon sa mga bata.

Gilauman nga sa umaabot nga mga adlaw, ipatuman usab ang programa sa ubang pampublikong eskwelahan sa dakbayan aron mas daghang kabataan ang makabenepisyo. Ang maong programa nagpakita sa padayon nga paningkamot sa DepEd ug sa Kanunay Asenso Ozamiz Administration sa pagtukod og mas himsog, lig-on, ug mas andam nga kabatan-onan alang sa umaabot.///