WORKING GOV. OAMINAL GIHIMAMAT ANG KB LEADERS; ATOL SA PAGSAULOG SA 51ST ANNIVERSARY SA KABATAANG BARANGAY

Malipayon nga gihimamat ni Working Governor Henry S. Oaminal ang iyang mga kauban kaniadto sa Kabataang Barangay (KB) gikan sa nagkadaiyang bahin sa nasud, isip kabahin sa pagsaulog sa 51st Anniversary sa Kabataang Barangay, diin ang Misamis Occidental mao ang host karong tuiga.

Gitambongan usab sa maong kalihokan ang mga opisyal ug miyembro sa KB gikan sa nagkadaiyang rehiyon, nga nagpadayon sa diwa sa pag-alagad ug pagpalig-on sa partisipasyon sa kabatan-onan sa komunidad.

Ang Kabataang Barangay (KB) natukod niadtong 1975 ubos sa administrasyon ni kanhi Presidente Ferdinand Marcos Sr. pinaagi sa Presidential Decree No. 684. Tumong niini ang paghatag og higayon sa kabatan-onan nga maapil sa lokal nga panggamhanan ug mahulma isip umaabot nga lider sa nasud.

Ang KB maoy nauna nga porma sa organisadong youth governance sa Pilipinas, ug gipulihan sa Sangguniang Kabataan human sa 1987 Constitution, apan nagpabilin ang kahulogan niini isip pundasyon sa liderato sa kabatan-onan.

Sumala kang Gov. Oaminal, dako ang papel sa KB sa paghubog sa iyang liderato ug sa daghang mga lider sa nasud karon, ug padayon kini nga inspirasyon sa kabatan-onan aron magmalampuson sa serbisyo publiko.

Video - GOV OAMINAL 

Samtang Mainitong gidawat sa probinsya si Department of Agrarian Reform (DAR) Secretary Conrado M. Estrella III. Ang pagbisita sa kalihim kabahin sa iyang partisipasyon isip guest speaker sa 51st Anniversary sa Kabataang Barangay, sa imbitasyon ni Working Governor Henry S. Oaminal.

Sa iyang mensahe nga gipahigayon sa Asenso Misamis Occidental Reaction and Adventure Park, diin gipadayag ni Secretary Estrella ang iyang suporta sa panagtambayayong tali sa DAR ug lokal nga panggamhanan. Ingon usab siya nga usa ka kaniadtong miyembro sa KB, naghatag siya og mensahe nga puno sa inspirasyon ug pagpalig-on sa panaghiusa sa gobyerno ug katawhan labi na kanila mga kabahin sa Kabataang Barangay kaniadto.