FOUR-DAY EMERGENCY RESPONSE TRAINING, GISUGDAN SA BARANGAY MALAUBANG

OZAMIZ CITY – Gisugdan na niining adlawa, Abril 14, 2026, ang upat ka adlaw nga Basic Emergency Response Training nga gipahigayon sa Covered Court sa Barangay Malaubang, dakbayan sa Ozamiz.

Ang maong pagbansay gipasiugdahan sa City Disaster Risk Reduction and Management Office (CDRRMO) ubos sa pagpanguna ni Mr. Popong Dela Cerna, CDRRM Local Officer III, uban sa iyang mga hanas nga staff.

Tumong sa maong training nga hatagan og igong kahibalo ug katakos ang mga partisipante nga gilangkuban sa mga Barangay Health Workers (BHW), Barangay Nutrition Scholars (BNS), Barangay Police Action Team (BPAT), ug ang mga Barangay Kagawad. Lakip sa mga itudlo mao ang saktong pamaagi sa Cardiopulmonary Resuscitation (CPR) ug uban pang mga dinalian nga life-saving techniques aron makatubag sa mga emerhensya sama sa atake sa kasingkasing, pagkalunod, ug uban pang mga trahedya. 

Dako ang kalipay ug pasalamat ni Barangay Captain Christopher Maghanoy sa maong inisyatibo. Sumala pa kaniya, dako kini og tabang aron mahimong andam ang iyang mga sakop sa barangay sa pagluwas og kinabuhi sa higayon nga adunay krisis.

Mapasalamaton usab si Kapitan Maghanoy sa padayong suporta sa LGU Ozamiz ubos sa pagdumala ni Mayor Sam Norman Fuentes, ingon man sa 3 Pillars sa probinsya nga kanunay’ng nagsuporta sa mga programa alang sa kaluwasan sa katawhan.