SOLID WASTE STUDY GIPAHIGAYON SA OZAMIZ; 10-YEAR WASTE MANAGEMENT PLAN GIANDAM

Nagpadayon ang Department of Environment and Natural Resources Provincial Office uban sa Solid Waste Environment Management Office sa pagpahigayon sa Waste Analysis and Characterization Study (WACS) aron mas mapalambo ang pagdumala sa basura sa dakbayan.

Sumala ni Environmental Monitoring Officer Jenica Clare M. Perico, ang maong pagtuon molungtad og lima ka adlaw ug gisalmutan sa mga opisyal gikan sa tanang 51 ka barangay sa Ozamiz City.

Tumong sa WACS ang pagtino sa eksaktong gidaghanon sa basura nga mapagawas matag panimalay ug sa matag barangay kada adlaw. Lakip usab niini ang pag-analisa sa basura gikan sa urban areas pinaagi sa gitawag og “End-of-Pipe Waste Analysis Characterization Study.”

Gipasabot sa ahensya nga mahinungdanon kaayo kining pagtuon aron masukod ang volume sa biodegradable, recyclable, ug residual waste sa dili pa kini dad-on sa sanitary landfill.

Ang resulta sa maong pagtuon maoy mahimong basihan sa paghimo sa 10-Year Solid Waste Management Plan sa syudad, nga gilauman magpalig-on sa mga programa sa kalikupan.

Ang inisyatibo gisuportahan sa Kanunay Asenso Ozamiz Administration ubos sa pagpangulo ni City Mayor Sam Norman Go Fuentes, nga nagtinguha sa mas limpyo, organisado, ug malungtarong pagdumala sa basura alang sa kaayohan sa tanang Ozamiznon.///