SCHOOL FENCE GIPALAMBO SA ASENSO OZAMIZ ADMINISTRATION

Nindot na ug mas luwas karon ang palibot sa ilang tulonghaan human sa konstruksyon ug improvement sa school fence ug gate sa Sancho Capa Integrated School, pinaagi sa proyekto nga gipasiugdahan sa Asenso Ozamiz Administration ni Mayor Atty. Indy Oaminal.

Ang proyekto nagkantidad og Php 3,113,429.03, nga naglangkob sa pagpaayo sa perimeter fence ug ganghaan sa maong eskwelahan aron mapalig-on ang seguridad sa mga estudyante ug magtutudlo.

Si Kapitan Niña Fe Romero sa Barangay Bagakay dako ang pasalamat sa administrasyon ni Mayor Indy Oaminal, ingon man usab sa suporta nila Congressman Ando Oaminal ug Governor Henry Oaminal, tungod kay pinaagi sa ilang paningkamot natuman ang maong proyekto nga dugay nang gikinahanglan sa ilang komunidad.

Matod ni Kap. Romero, “Dili lang kini pangdekorasyon nga proyekto, apan dakong tabang kini alang sa kaluwasan sa atong mga kabataan ug sa pagpanindot sa kahimtang sa edukasyon sa among barangay.”

Kini nga proyekto usa lamang sa daghang gipadayon nga imprastruktura ubos sa Asenso Ozamiz Program, nga nagtinguha sa kalambuan ug kasigurohan sa mga katawhan sa syudad.///(Glenn Ray Roluna/MNN)