𝐇𝐮𝐠𝐨𝐭 𝐛𝐚𝐤𝐮𝐬 𝐚𝐧𝐠 𝐦𝐠𝐚 𝐁𝐚𝐫𝐚𝐧𝐠𝐚𝐲 𝐬𝐚 𝐎𝐳𝐚𝐦𝐢𝐳 𝐬𝐚 𝐤𝐚𝐦𝐩𝐚𝐧𝐲𝐚 𝐁𝐚𝐭𝐨𝐤 𝐃𝐞𝐧𝐠𝐮𝐞

Gipatuman sa nagkadaiyang barangay sa dakbayan ang ilang hugot nga suporta sa kampanya batok dengue, pinaagi sa mas gipakusgan nga search and destroy operations ug pagpanglimpyo sa palibot, ilabi na sa mga purok nga gilangkuban sa daghang panimalay. Lakip sa mga barangay nga aktibo sa kalihukan mao ang Barangay Bagakay, 50th District, ug Barangay Diguan, diin ang ilang mga kapitan mipadayag sa ilang dedikasyon sa pagprotektar sa panglawas sa katawhan ug pagsuporta sa mga programa sa Asenso Ozamiz Administration ilawom sa liderato ni Mayor Atty. Indy Oaminal.

Sa Barangay Bagakay, gibutyag ni Kapitana Nina Fe Remero nga dako ug tabang ang giinisyatibang clean-up drive ug intensified search and destroy operations nga gisugdan ni Mayor Oaminal. Matod niya, ang katapusan nga kaso sa dengue nga natala sa ilang barangay mao pa niadtong Enero, ug sukad niadto hangtod karon wala nay bag-ong kaso sa dengue.

Samtang sa 50th District, mipasalig usab si Kapitana Evelyn Recamadas nga ilang gitutukan ang pagmintinar sa kalimpyo ug kaayohan sa palibot, uban sa aktibong partisipasyon sa barangay officials, tanod, ug katawhan.

Sa Barangay Diguan, mipadayag si Kapitan Camilo Rupinta sa maayong kooperasyon sa mga residente, nga nagpasiugda sa maayong resulta sa ilang kampanya batok dengue.

Ang maong paningkamot sa matag barangay nagadala og konkreto nga resulta, sama sa pagkunhod sa kaso sa dengue ug pagmintinar sa malimpyo ug luwas nga komunidad. Kini nga kalihukan nagpamatuod sa hugot nga panaghiusa tali sa lokal nga pangagamhanan ug katawhan, nga nagtumong sa panglawas, kahapsay ug kaluwasan sa tanan usa ka tin-aw nga ehemplo sa epektibong pagpangagamhanan ilawom sa Asenso Ozamiz Administration.///(Glenn Ray Roluna/MNN)