𝐊𝐎𝐍𝐒𝐓𝐑𝐀𝐊𝐒𝐘𝐎𝐍 𝐒𝐀 𝐁𝐀𝐆-𝐎𝐍𝐆 𝐌𝐔𝐋𝐓𝐈-𝐏𝐔𝐑𝐏𝐎𝐒𝐄 𝐁𝐔𝐈𝐋𝐃𝐈𝐍𝐆 𝐒𝐀 𝐏𝐀𝐍𝐓𝐀𝐎𝐍, 𝐆𝐈𝐒𝐔𝐆𝐃𝐀𝐍 𝐍𝐀

Gisugdan karong semanaha ang konstruksyon sa bag-ong Multi-Purpose Building alang sa Nutrition Office ug Child Development Center sa Barangay Pantaon, Ozamiz City. Ang proyekto nagkantidad og Php 6,447,895.47 ug gitumong aron mapalambo ang mga pasilidad sa serbisyo publiko sa barangay.

Ang proyekto gipasiugdahan sa Asenso Ozamiz Administration ubos sa liderato ni Mayor Atty. Henry “Indy” Oaminal Jr., uban sa suporta nila Governor Henry S. Oaminal ug Congressman Ando Oaminal, isip kabahin sa padayon nga kampanya sa pagserbisyo sa katawhan sa lungsod ug kabarangayan.

Si Kapitan Constantino Lahaylahay sa Barangay Pantaon mapasalamaton gayud sa maong proyekto nga gibubu sa ilang barangay. Matod pa niya, kini dakong tabang sa ilang mga residente labi na sa aspeto sa nutrisyon ug edukasyon sa kabataan. Gipasalamatan usab niya si Mayor Indy sa paghatag prioridad sa ilang lugar ug sa hugot nga suporta gikan sa probinsyal nga liderato.

Tinguha sa proyekto nga mapatukod ang usa ka moderno, lig-on ug hapsay nga pasilidad alang sa mga serbisyo sa komunidad. Kini nga inisyatiba nagpakita sa tinuod nga paningkamot sa Asenso Ozamiz Administration sa pagpatuman sa mga proyekto nga makatabang sa katawhan ug makapadali sa ilang pag-angkon og maayong serbisyo.///(Glenn Ray Roluna/MNN)