𝗔𝗦𝗘𝗡𝗦𝗢 𝗢𝗭𝗔𝗠𝗜𝗭 𝗡𝗔𝗚𝗛𝗔𝗧𝗔𝗚 𝗢𝗚 𝗕𝗔𝗚-𝗢𝗡𝗚 𝗣𝗔𝗚𝗟𝗔𝗨𝗠 𝗨𝗚 𝗣𝗔𝗡𝗚𝗜𝗡𝗔𝗕𝗨𝗛𝗜𝗔𝗡 𝗦𝗔 𝗠𝗚𝗔 𝗣𝗪𝗨𝗗𝘀

 

Nagpadayon ang Kanunay Asenso Ozamiz Administration ubos sa pagpangulo ni Mayor Sam Norman Go Fuentes sa pagpalig-on sa kampanya batok sa ilegal nga droga pinaagi sa rehabilitasyon ug paghatag og mga oportunidad sa panginabuhian alang sa mga Persons Who Use Drugs (PWUDs).

Karong adlawa, malampusong gilunsad ang ika-12 nga batch sa Aftercare Program pinaagi sa Asenso Ozamiz Sustainable Livestock Livelihood Assistance Program nga gipahigayon sa Barangay Doña Consuelo.

Anaa sa 30 ka benepisyaryo ang nakadawat og livestock dispersal isip panginabuhian, lakip ang 7 ka baboy, 3 ka kanding, ug 20 ka pares nga manok. Ang maong programa nagtumong sa paghatag og dugang oportunidad aron makatukod sila og lig-on nga panginabuhian samtang nagpadayon sa ilang pagbag-o ug pagbalik isip produktibong miyembro sa komunidad.

Mitambong sa maong kalihokan sila City Councilor Marcelian C. Tapayan, Chairman sa Committee on Peace and Order; SK Federation President Councilor John Fel Duhaylungsod; mga representante sa Ozamiz City Police Station, City Veterinary Office, ug si Nurse II Mary Jane R. Murallon, SUPI Mental Health Program Coordinator.

Gipasiugda sa mga opisyal nga ang programa dili lamang naghatag og materyal nga tabang apan usa usab ka pamaagi sa pagdasig sa mga benepisyaryo nga magpadayon sa ilang positibong pagbag-o ug malikayan ang pagbalik sa ilegal nga droga.

Pinaagi sa Aftercare Program, padayon nga gipakita sa Dakbayan sa Ozamiz ang iyang pasalig sa pagpalambo sa kinabuhi sa mga PWUDs pinaagi sa rehabilitasyon, suporta sa panginabuhian, ug paghatag kanila og bag-ong kahigayunan aron mahimong responsableng mga sakop sa katilingban.//