𝗥𝗣𝗢𝗖-𝟭𝟬 𝗠𝗜𝗗𝗔𝗬𝗘𝗚 𝗦𝗔 𝗣𝗥𝗢-𝟭𝟬 𝗧𝗨𝗡𝗚𝗢𝗗 𝗦𝗔 𝟭𝟮% 𝗣𝗔𝗚𝗞𝗨𝗡𝗛𝗢𝗗 𝗦𝗔 𝗞𝗥𝗜𝗠𝗘𝗡 𝗨𝗚 𝗧𝗔𝗔𝗦 𝗡𝗚𝗔 𝗣𝗔𝗚𝗦𝗔𝗟𝗜𝗚 𝗦𝗔 𝗣𝗨𝗕𝗟𝗜𝗞𝗢

 CAGAYAN DE ORO CITY — Gidayeg sa Regional Peace and Order Council (RPOC)-10 ang Police Regional Office-10 (PRO-10) ubos sa pagpangulo ni Police Regional Director PBGEN Christopher N. Abrahano tungod sa talagsaong nahimo niini sa ikaduhang kwarter sa tuig 2026.

Ang maong pagdayeg gipalig on pinaagi sa usa ka resolusyon nga gipangunahan ni Camiguin Governor Atty. Xavier Jesus D. Romualdo, Chairman sa RPOC-10. Ang mosyon sa paghatag og pagkilala gisang-at ni Governor Atty. Henry S. Oaminal, Sr. sa Misamis Occidental.

Base sa report nga gipresentar atol sa konseho, nakatala ang PRO-10 og 12 porsiyentong pagkunhod sa walo ka focus crimes sa Northern Mindanao, usa ka timailhan sa epektibong kampanya batok sa kriminalidad ug pagpalig-on sa community-based policing program.

Samtang ang PRO-10 adunay 87 porsiyentong Crime Solution Efficiency Rate, nga mas taas kaysa sa 79 porsiyentong national target, nagpasabot nga mas daghang kaso ang nasulbad ug nahatagan og hustisya.

Dugang pa, nakab-ot sa PRO-10 ang 87.40 porsiyentong Net Satisfaction Rating gikan sa independent survey nga gihimo sa University of Science and Technology of the Philippines (USTP), nga nagpakita sa pagsalig ug suporta sa publiko sa serbisyo sa kapulisan sa rehiyon.

Gipahayag sa RPOC-10 ang ilang pagsalig nga magpadayon ang PRO-10 sa pagpalig-on sa kampanya batok sa krimen, pagpatuman sa balaod, ug pagserbisyo sa komunidad aron mapadayon ang malinawon ug luwas nga kahimtang sa Northern Mindanao.

Ang maong kalampusan usa ka pagpamatuod sa padayon nga paningkamot sa kapulisan ug sa kooperasyon sa komunidad sa pagmintinar sa kalinaw ug kahapsay sa rehiyon.///