𝗔𝗦𝗘𝗡𝗦𝗢 𝗖𝗨𝗟𝗧𝗨𝗥𝗔𝗟 𝗔𝗡𝗗 𝗦𝗣𝗢𝗥𝗧𝗦 𝗗𝗢𝗠𝗘 𝗜𝗧𝗨𝗞𝗢𝗗 𝗦𝗔 𝗖𝗟𝗔𝗥𝗜𝗡

 

Human sa malampusong pag-abli sa AMORAP Sports Facilities, sa padayong pagpalapad sa Ozamiz Airport, ug sa umaabot nga pagbukas sa Asenso Misamis Occidental Medical Center, laing dakong proyekto na usab ang gilunsad sa Provincial Government of Misamis Occidental—ang pagtukod sa Asenso Cultural and Sports Dome sa lungsod sa Clarin.

Gilauman nga mahimong usa sa kinadak-ang event ug sports venues sa lalawigan, ang dome adunay kapasidad nga mokabat sa 6,400 ka tawo ug pagatukoron sa usa ka 3,550-square-meter nga luna.

Bag-ohay lang nagpahigayon og miting si Governor Henry S. Oaminal uban ni Clarin Mayor Riza Oaminal de los Santos ug sa technical team aron susihon ang mga plano ug preparasyon alang sa groundbreaking ceremony sa proyekto.

Gilaraw ang dome nga mahimong sentro sa dagkong sporting events, cultural performances, conventions, exhibitions ug uban pang pampublikong kalihokan. Sa kinatibuk-an, adunay 2,400 ka lingkoranan alang sa theater-style events ug mokabat sa 4,000 ka lingkoranan alang sa sports competitions ug dagkong tigom.

Dili lamang kini usa ka ordinaryong imprastraktura kondili usa ka dugayng puhunan alang sa sports, kultura, turismo ug community development. Gilauman nga mahimo kini nga venue sa regional tournaments, concerts, educational activities ug ubang kalihokan nga makapadasig sa lokal nga ekonomiya ug makapahiusa sa mga Misamisnon.

Aron masiguro ang sustainable development, gimando usab ni Gov. Oaminal ang pag-apil sa solar energy system sa disenyo sa maong pasilidad. Dugang pa niini, iyang gimandoan ang pagdugang sa technical personnel aron mapaspasan ang implementasyon ug masiguro ang target nga paghuman niini sa tuig 2027.///