ARSOBISPO JUMOAD: ANG KALAMIDAD DILI KATAPUSAN KUNDI HIGAYON SA PAGBALIK SA GINOO

 

Usa ka makapatandog ug mapamalandong nga pastoral nga mensahe ang gipagawas ni Most Reverend Martin S. Jumoad, D.D., Arsobispo sa Arkidiyosesis sa Ozamiz, isip tubag sa makusog nga 7.8 magnitude nga linog nga miigo sa GenSan ug Davao Occidental niadtong Hunyo 8 ug nabati usab sa daghang bahin sa Mindanao.

Sa iyang sulat nga adunay ulohang "Kon ang Yuta Mouyog, ang Kasingkasing sa Ginoo Uyogon Usab Aron Malooy," gipasiugda sa Arsobispo nga ang matag linog dili lamang usa ka panghitabo sa kinaiyahan kondili usa usab ka pagpahinumdom aron ang tawo mamalandong, maghinulsol ug mobalik sa Ginoo.

"Ang kada linog maoy usa ka sermon nga walay mga pulong apan adunay pagtay-og sa konsensya ug kasingkasing aron ang tawo mobalik ug maghinulsol sa iyang mga sala," matod ni Jumoad.

Gihisgutan usab sa Arsobispo ang mga pag-antos ug kasakit nga nasinati sa mga biktima sa linog, nga iyang gitandi sa pag-ampo ni Hari David sa Salmo 13 ug sa pag-antos ni Hesukristo didto sa krus.

"Dios ko, Dios ko nganong gibyaan mo ako," maoy usa sa mga pulong nga gihinumdoman sa Arsobispo isip simbolo nga bisan sa pinakalisod nga kahimtang, ang Dios nakasabut sa kasakit ug pag-antos sa katawhan.

Gipasabot usab niya nga ang mga kalamidad dili silot gikan sa Ginoo, kondili usa ka "wake-up call" aron ang katawhan maghinulsol ug magpakita og kaluoy ug pagtabang sa isigkatawo.

"Wake up call ang 7.8 nga linog aron kita nga mga nakasaksi maghinulsol ug mopakita og kaluoy," matod pa niya.

Sa pastoral letter, gipahinumdoman usab ni Jumoad ang mga tumutuo nga ang Dios dili mobiya sa mga nag-antos ug magpadayon sa paghatag og paglaum pinaagi sa gugma ug panaghiusa sa simbahan ug komunidad.

Tungod niini, gihangyo sa Arsobispo ang tanang parokya sa Arkidiyosesis sa Ozamiz nga maghimo og second collection aron matabangan ang mga biktima sa linog. Ang mga malikom nga halad ipadala ngadto sa Chancery isip suporta sa mga naapektuhan sa maong katalagman.

Gitapos ni Jumoad ang iyang mensahe pinaagi sa pag-awhag sa tanang tumutuo nga maghiusa sa pagpakita sa gugma ug pagtinabangay.

"Maghi-usa kita sa pagpakita sa gugma ug panaghiusa isip usa ka Simbahan nga buhi ug matinabangon," matod sa Arsobispo.

Ang maong pastoral letter gipagawas sa Archdiocesan Chancery niadtong Hunyo 12, 2026 ug gipaambit ngadto sa tanang kaparian, relihiyoso, relihiyosa, ug mga tumutuo sa Arkidiyosesis sa Ozamiz isip giya sa pag-atubang sa mga pagsulay ug kalisdanan uban sa pagtuo ug paglaum.///