ALS GRADUATION RITES, MALAMPUSONG GIPAHIGAYON SA OZAMIZ CITY

Malampusong gipahigayon ang Graduation Rites ug Completion Ceremony alang sa 242 ka Alternative Learning System (ALS) graduates ug completers niadtong Hunyo 11, diin gisaulog ang ilang kalampusan human sa mga tuig sa pagpaningkamot ug paglahutay sa ilang pagtuon.

Gitambongan sa mga opisyal sa Department of Education (DepEd), lokal nga mga lider, stakeholders, ginikanan, ug mga magtutudlo ang maong kalihukan aron pasidunggan ang mga ALS learners nga nakab-ot ang laing importante nga lakang sa ilang edukasyonal nga panaw.

Lakip sa mga nahimong highlight sa programa ang pag-apod-apod sa mga tablets ngadto sa Grade 11 ug Grade 12 ALS learners, isip kabahin sa paningkamot sa DepEd sa pagpalig-on sa digital learning ug paghatag og mas maayong akses sa teknolohiya alang sa ilang pagkat-on.

Gipadayag usab ang dakong suporta sa Kanunay Asenso Ozamiz Administration ni Mayor Sam Norman Go Fuentes, nga mipasiugda sa padayon nga pagpalig-on sa mga programa para sa edukasyon sa dakbayan.

Personal usab nga misalmot sa maong kalihukan si DepEd X Regional Director Ruth Fuentes, uban sa presensya sa mga lokal nga opisyales sama nila Councilor Cecile Co ug Councilor John Fel Duhaylungsod, nga mipakita sa ilang suporta sa kalampusan sa ALS learners.

Ang Alternative Learning System (ALS) usa ka programa sa gobyerno nga nagtanyag og ikaduhang higayon sa edukasyon alang sa mga out-of-school youth ug hamtong nga wala makahuman sa pormal nga pag-eskwela. Pinaagi sa flexible ug learner-centered nga pamaagi sa pagtudlo, ang ALS naghatag og oportunidad sa matag Pilipino nga makakuha og batakang edukasyon ug makahimo sa pagpadayon sa mas taas nga pagtuon o pagpangitag mas maayong panginabuhian.

Ang pagtapos sa 242 ka ALS learners dili lamang usa ka personal nga kalampusan alang kanila ug sa ilang mga pamilya, kondili usa usab ka pamatuod sa misyon sa ALS nga mahimong tulay padulong sa inklusibo ug kalidad nga edukasyon alang sa tanan./