OFOP SCHOLARS SA OZAMIZ NAKADAWAT SA ILANG MONTHLY ALLOWANCE; MAYOR SAM FUENTES PERSONAL NGA NAKIG ISTROYA SA MGA KABATAN ONAN

Dungan nga gipahigayon ang orientation ug allowance payout alang sa 1,026 ka mga benepisyaryo sa One Family, One Professional (OFOP) Scholarship Program karong adlawa Abril 8 sa Ozamiz City National High School Gymnasium.

Matag iskolar nakadawat og ₱5,000 nga monthly allowance, o katumbas sa ₱25,000 matag semestre, nga gitumong aron matabangan ang ilang gastuhan sa eskwelahan sama sa plete, puy-anan, ug school supplies.

Gipasiugdahan ang programa ubos sa liderato ni Governor Henry S. Oaminal, uban sa panagtambayayong nila Vice Governor Rowena Gutierrez, 1st District Congressman Jason Paredes Almonte, 2nd District Congressman Ando Oaminal, ug Ozamiz City Mayor Sam Norman Go Fuentes, isip kabahin sa ilang padayon nga suporta sa edukasyon.

Mitambong usab sa maong kalihokan sila City Councilor Cecile Co ug SK Federation President / City Councilor John Fel Duhaylungsod nga nagpakita sa ilang suporta sa mga kabatan-onan.

Sa iyang mensahe, gi-awhag ni Mayor Fuentes ang mga iskolar nga paningkamotan ug dili sayangon ang oportunidad nga ilang nadawat. Matud pa niya, ang kalampusan sa ilang pagtuon dili lamang alang sa ilang kaugalingon kondili usa usab ka dako nga tabang sa ilang pamilya.

Ang maong inisyatibo nagpadayon sa pag-abli og pultahan alang sa mga estudyante nga nanginahanglan og pinansyal nga tabang aron makapadayon ug makahuman sa ilang edukasyon.///