𝐁𝐀𝐆-𝐎𝐍𝐆 𝐁𝐀𝐑𝐀𝐍𝐆𝐀𝐘 𝐇𝐄𝐀𝐋𝐓𝐇 𝐒𝐓𝐀𝐓𝐈𝐎𝐍 𝐈𝐓𝐔𝐊𝐎𝐃 𝐒𝐀 𝐁𝐀𝐑𝐀𝐍𝐆𝐀𝐘 𝐊𝐈𝐍𝐔𝐌𝐀𝐍 𝐒𝐔𝐑; 𝐂𝐎𝐍𝐆𝐑𝐄𝐒𝐒𝐌𝐀𝐍 𝐀𝐍𝐃𝐎 𝐎𝐀𝐌𝐈𝐍𝐀𝐋 𝐆𝐈𝐏𝐀𝐒𝐀𝐋𝐀𝐌𝐀𝐓𝐀𝐍 𝐓𝐔𝐍𝐆𝐎𝐃 𝐒𝐀 𝐌𝐀𝐎𝐍𝐆 𝐃𝐀𝐋𝐀𝐘𝐆𝐎𝐍𝐎𝐍 𝐍𝐆𝐀 𝐏𝐑𝐎𝐘𝐄𝐊𝐓𝐎

Dako nga proyekto ang gilauman nga matuman sa Barangay Kinuman Sur, Ozamiz pinaagi sa pagpatukod sa usa ka modernong Barangay Health Station nga mokabat ngadto sa P2.4 milyon. Ang maong proyekto nasulod ubos sa General Appropriations Act (GAA) 2024, nga pinasikad sa pagpaningkamot ni 2nd District Congressman Ando Oaminal ngadto sa National Government pinaagi sa suporta nila Presidente Ferdinand “Bongbong” Marcos Jr. ug House Speaker Martin Romualdez.

Ang maong proyekto adunay dakong suporta ni Ozamiz City Mayor Atty. Indy Oaminal ug Misamis Occidental Governor Henry S. Oaminal, nga nagpakita sa ilang kusganong pakig-alayon alang sa kaayuhan sa mga residente sa maong barangay. Ang Barangay Health Station gilauman nga mahimong fully equipped ug modernong pasilidad, nga mag-alagad sa mga panglawas nga panginahanglanon sa mga katawhan sa Kinuman Sur.

Sa pikas bahin, si Kapitan Ricky Alduhesa sa Barangay Kinuman Sur mipadayag sa iyang dako nga pasalamat sa mga lider nga mi-padayon ug nangusog alang sa maong proyekto. Matod pa ni Alduhesa, ang maong health station dako og ikatabang sa mga residente ilabi na sa mga kinahanglan ug medical services nga duol sa ilang lugar.

Ang pagpatukod sa maong health station usa ka pagpakita sa padayon nga suporta ug pagpalambo sa mga rural nga barangay sa Ozamiz ug Misamis Occidental, diin ang mga local officials nagtinabangay aron mapalambo ang kahimtang sa panglawas ug kaayuhan sa katawhan.

Ang Barangay Health Station sa Kinuman Sur gilauman nga matukod ug magamit na sa mga residente sa umaabot nga tuig, usa ka dakong tabang sa maong Barangay.///(Glenn Ray Roluna/MNN)