“𝑹𝒖𝒍𝒆 𝒐𝒇 𝑳𝒂𝒘 𝒎𝒖𝒔𝒕 𝒑𝒓𝒆𝒗𝒂𝒊𝒍 𝒂𝒏𝒅 𝒎𝒖𝒔𝒕 𝒃𝒆 𝒓𝒆𝒔𝒑𝒆𝒄𝒕𝒆𝒅 𝒂𝒏𝒅 𝒐𝒃𝒆𝒚𝒆𝒅.” - 𝑨𝒓𝒄𝒉𝒃𝒊𝒔𝒉𝒐𝒑 𝑱𝒖𝒎𝒐𝒂𝒅

 

Ang Obispo gikan sa Mindanao niawhag sa tele-evangelist nga si Pastor Apollo Quiboloy-lider sa Gingharian ni Jesu-Kristo nga mosurender ug atubangon ang kaso nga gipasaka batok kaniya.

Matod ni Ozamis Archbishop Martin Jumoad, alang kini sa iyang mga sumusunod ug aron mahunong na ang kapintasan. Ang Obispo niingon nga mas maayong didto na sa korte ang pastor ang mopasabot ug molimpyo sa iyang pangalan batok sa mga kaso nga gipasaka batok kaniya.

“Kinahanglang mo-surrender na si Pastor Quiboloy para sa kaayohan sa iyang katawhan ug aron mahunong na ang dugang nga pagkawala sa kinabuhi ug kadaot sa kabtangan. Kung inosente siya, naa ang korte. Rule of Law must prevail and must be respected and obeyed,” sumala sa mensahe sa obispo sa Radyo Veritas.

Nahitabo usab ang kasamok tali sa kapolisan ug sa mga sumusunod ni Quiboloy sa Kingdom of Jesus Christ compound sa Davao City, dihang gi-serve sa kapolisan ang warrant of arrest batok sa pastor.

Bisan og wa pa masikop sa kapolisan si Quiboloy, duha ka gidudahang biktima sa human trafficking ang naluwas sa kapolisan ug sa Department of Social Welfare and Development (DSWD) gikan sa sulod sa KOJC compound sa Davao City. Ang rescue operation gihimo dungan sa pagpasaka og warrant of arrest batok kang Quiboloy ug kaubang akusado nga nag-atubang og kasong child abuse ug human trafficking.///