𝗠𝗴𝗮 𝗽𝗿𝗼𝘆𝗲𝗸𝘁𝗼 𝘂𝗴 𝗲𝘀𝘁𝗿𝗮𝗸𝘁𝘂𝗿𝗮 𝗴𝗶𝗯𝘂𝗸𝘀𝗮𝗻 𝘀𝗮 𝗹𝘂𝗻𝗴𝘀𝗼𝗱 𝘀𝗮 𝗣𝗹𝗮𝗿𝗶𝗱𝗲𝗹, 𝗠𝗶𝘀𝗮𝗺𝗶𝘀 𝗢𝗰𝗰𝗶𝗱𝗲𝗻𝘁𝗮𝗹

Pinaagi sa hiniusang paningkamot ni Governor Henry S. Oaminal, First District Representative Jason Almonte ug sa mga opisyal sa municipal government sa Plaridel, laing milestone ang gisaulog sa lungsod sa Plaridel, Agosto 18, uban sa pagbendisyon sa bag-ong improvised nga municipal building ug mga opisina nga mokabat sa P3 milyones.

Ang maong kalihukan personal nga gitambongan nila ni Gobernador Oaminal, Bise Gobernador Rowena Gutierrez, First District Representative Almonte, Plaridel Municipal Mayor Gadwin E. Handumon, mga opisyal sa munisipyo ug barangay, ug lain-laing ahensya sa nasudnong kagamhanan ug LGUs.

Ang nasangpit nga imprastraktura mao ang produkto sa pagpatuman sa Phase 1 sa proyekto, ug gilauman nga mapataas ang standard o sumbanan sa paghatod sa mga batakang serbisyo alang sa kasayon ug kaharuhay sa mga Plaridelnon. Dinhi nahimutang ang mga buhatan sa treasurer ug assessor, ug ang government assistance for development center o kanhi gitawag nga one-stop-shop.

Ang sunod nga hugna mao ang renovation sa 2nd Floor sa Municipal Hall nga mag-feature sa moderno ug sleek office spaces.

Sa pikas bahin, isip katumanan sa ilang pasalig sa pagpasiugda alang sa usa ka holistic sports development alang sa mga batan-on, si Misamis Occidental Governor Henry Oaminal, First District Representative Jason Almonte ug Mayor Gadwin Handumon nangulo sa ceremonial breaking of ground alang sa pagsugod sa pagtukod sa Plaridel Sports Complex, niadtong Agosto 18, 2023.

Ang proyekto mogamit sa inisyal nga pundo nga nagkantidad og P45 milyones aron makahimo og bag-ong gipaayo nga oval track ug football field.

Dugang pa niini, nagtimaan usab kini sa pagpangandam sa probinsiya sa pag-host sa nagkalain-laing local ug national sports events sama sa 2024 Northern Mindanao Regional Athletic Association (NMRAA), 2025 Batang Pinoy, ug 2026 Palarong Pambansa, usa sa mga dagkong proyekto mao ang pagtukod sa Plaridel Sports Complex.///(MNN)