POLISIYA SA PAGPATAAS SA MINIMUM WAGE, GISUSI NI SENADOR TULFO

Miduso ug resolusyon si Sen. Raffy Tulfo para rebyuhon ang kasamtangang polisiya sa gobyerno sa minimum wage increase aron mapalambo ang kalidad sa kinabuhi sa mga empleyado, partikular na ang mga anaa sa lower income bracket.

Sa Senate Resolution No. 476, gipahayag ni Tulfo nga daw dili igo ang minimum wage increase niadtong nakalabayng tuig gumikan kay daghan pa gihapong kawani ang nakasinati ug problemang pinansyal.

Ang labing uwahing minimum wage increase niadtong Hunyo 4, 2022 kung diin ang rate gikan sa P533 hangtud na sa P570 kada adlaw sa NCR.

Samtang, ang minimum wage hike usab sa mga probinsiya gikan sa Hunyo 6 hangtud na sa 30, 2022 nga gikan sa P306 hangtud na sa P470.

Taliwala sa nasangpit nga pagtaas, gipahayag ni Senador Tulfo nga ang mitaas nga inflation nga mitaas pa sa 8.7% niadtong Enero 2023 adunay dakung epekto sa pagpakabuhi sa mga empleyado.///