Global Seminar Gipasiugdahan sa CARD MBA Alang sa Mas Inklusibong Microinsurance

Makati City – Nagpahigayon ang CARD Mutual Benefit Association (CARD MBA) sa unang Mutual Microinsurance Network Seminar uban sa International Cooperative and Mutual Insurance Federation (ICMIF) Foundation gikan Hunyo 17 hangtod 19, 2026 sa AIM Conference Center sa Makati City. Tumong niini ang pagpalig-on sa panagtinabangay aron mapanalipdan ang mga pamilyang ubos og kita.

Ang tulo ka adlaw nga seminar adunay tema nga "Replicating Success Globally: Scaling the Mutual Microinsurance Model for the Poorest." Gitigoman niini ang mga eksperto ug lider sa microinsurance gikan sa nagkadaiyang nasod aron magbinayloay og kasinatian, mga estratehiya, ug bag-ong inobasyon sa paghatag og mas episyente ug inklusibong serbisyo sa insurance alang sa mga kabus nga komunidad.

Matod ni Dr. Jaime Aristotle B. Alip, Founder ug Chair Emeritus sa CARD MRI, dako kaayo ang mga hagit nga giatubang sa mga kabus nga komunidad ug dili kini masulbad sa usa lamang ka institusyon. Busa, importante ang panaghiusa, pagpaambit sa kahibalo, ug pagsundog sa malampusong mga modelo aron mas mapalig-on ang microinsurance sa tibuok kalibotan.

Sa ikaduhang adlaw, gipakita sa CARD MBA ang ilang pag-uswag gikan sa usa ka mutual fund ngadto sa usa ka mutual microinsurance provider. Gipasundayag usab nila ang ilang sistema sa pagdumala, teknolohiya sa pagproseso sa claims, ug ang ilang paagi sa paghatag og serbisyo pinaagi sa CARD MRI Financial Institutions.

Sumala ni CARD MBA CEO Jocelyn Dequito, ang kalampusan sa mutual microinsurance nag-agad sa pagsalig tali sa mga institusyon, mga miyembro, ug sa mga organisasyong nagtinabangay aron mapanalipdan ang mga komunidad nga adunay ubos nga kita.

Sa katapusang adlaw, mibisita ang mga partisipante sa San Pablo City, Laguna, diin ilang nasaksihan ang center meeting sa CARD Bank ug ang aktuwal nga paghatag sa CARD MBA sa mga serbisyo sa insurance ngadto sa mga miyembro.

Mitambong sa maong seminar ang 101 ka practitioners ug mga lider sa microinsurance gikan sa Pilipinas ug ubang mga nasod sama sa United Kingdom, Myanmar, India, Kenya, Hong Kong, Indonesia, Malawi, Mozambique, Paraguay, Thailand, ug Timor-Leste. Gipasiugda sa maong kalihokan ang importansya sa kolaborasyon aron mapalapdan ang pinansyal nga proteksyon ug makahimo og lig-on nga economic safety net alang sa mga komunidad nga nanginahanglan.///