𝗗𝗨𝗛𝗔 𝗞𝗔 𝗟𝗔𝗟𝗔𝗞𝗜, 𝗡𝗔𝗛𝗨𝗟𝗢𝗚 𝗦𝗔 𝗦𝗣𝗜𝗟𝗟𝗪𝗔𝗬 𝗦𝗔 𝗖𝗟𝗔𝗥𝗜𝗡

Duha ka lalaki ang nalambigit sa usa ka aksidente human mahulog ang ilang gisakyan nga motorsiklo sa spillway sa Barangay Malibangcao, Clarin niining lungsod.

Ang mga biktima giila nga sila Jeter Rosie, 47 anyos, ang drayber, ug Joseph Lugcuban, 34 anyos, parehong lumulupyo sa Barangay Guba, Clarin.

Base sa imbestigasyon, nagbiyahe ang duha sakay sa motorsiklo nga gimaneho ni Jeter samtang si Joseph ang iyang angkas. Sa ilang pag-abot sa spillway, misulay sila pagtabok human nakita nga nakalusot na ang ubang sakyanan. Apan sa ilang pag-abante, kalit lang natumba ang motorsiklo ug nahulog silang duha sa tubig.

Ang angkas nga si Joseph dali nga nakalingkawas ug nakalangoy paingon sa luwas nga dapit, samtang ang drayber nga si Jeter wala dayon makita nga hinungdan sa pag-alarm sa mga nakasaksi.

Tungod niini, miarangkada dayon ang rescue response sa Coast Guard Clarin, MDRRMO Clarin, ug PNP Clarin aron pangitaon ang nawala nga drayber. Apan atol sa operasyon, nasayran nga luwas na diay si Jeter ug nakagawas ra gikan sa maong insidente.

Sa maong hitabo, si Jeter Rosie nakaangkon lamang og gagmay’ng samad, samtang si Joseph walay seryosong samad nga naangkon.

Karon, parehong anaa na sa maayo nga kahimtang ang duha ug gihatagan og saktong pag-atiman ug tabang sa mga awtoridad. Ang insidente usa ka pahimangno sa mga motorista nga mag-amping gayod ilabi na sa pagtabok sa mga spillway ug bahaon nga lugar.//