𝐁𝐚𝐠-𝐨𝐧𝐠 𝐌𝐑𝐈 𝐔𝐧𝐢𝐭 𝐠𝐢𝐛𝐮𝐤𝐬𝐚𝐧 𝐬𝐚 𝐌𝐇𝐀𝐑𝐒 𝐌𝐞𝐝𝐢𝐜𝐚𝐥 𝐂𝐞𝐧𝐭𝐞𝐫

Niadtong Oktubre 9, 2024, Opisyal nga gibuksan ang pinakabag-ong Magnetic Resonance Imaging (MRI) unit sa Mayor Hilarion A. Ramiro Sr. Medical Center (MHARSMC), usa ka dakong lakang alang sa health services sa Misamis Occidental. Ang maong kalihokan gipahigayon sa Deputy Speaker Diagnostic and Medical Building sa MHARSMC atol sa ika-53 nga anibersaryo sa maong tambalanan.

Ang MRI machine, ang una nga makina nga anaa sa probinsya, gipondohan pinaagi sa paningkamot ni Misamis Occidental Governor Henry S. Oaminal, nga kaniadto nagsilbi isip Deputy Speaker sa House of Representatives. Kini nga kagamitan naglantaw nga makapadayon sa mas episyenteng serbisyo sa diagnostic imaging nga gikinahanglan alang sa mas maayo nga pag-atiman sa mga

pasyente.

Sa iyang mensahe, si Cong. Ando Oaminal mihatag sa iyang mainiton nga pasalamat ug pagdayeg sa mga opisyal ug kawani sa MHARSMC tungod sa ilang walay puas nga dedikasyon ug paningkamot sa paghatag ug kalidad nga serbisyong medikal. Gipasabot usab niya nga bisan pa man sa kalampusan karon, aduna gihapon siyay panglantaw nga mahimong mas mapaayo pa ang serbisyo, ug gi-awhag niya ang tanang medical personnel nga ipadayon ang ilang paningkamot aron mas mapalambo ang serbisyo alang sa mga Misamisnon ug sa mga Pilipino.

Gipaabot nga ang bag-ong MRI unit makaserbisyo sa libo-libong mga pasyente ug magpabiling usa ka timaan sa pangunang mga serbisyo medikal sa rehiyon. Ang pag-upgrade niini sa MHARSMC nagpakita sa ilang padayong paningkamot nga mapalambo ang kahimsog sa publiko ug maseguro nga makadawat og kalidad nga serbisyo medikal ang mga pasyente.

Pinaagi sa teknolohiyang MRI, ang MHARSMC dili lamang nagpadako sa ilang diagnostic services, apan nagpatigbabaw usab sila isip usa ka modelong health institution sa Misamis Occidental, nga nagpakita sa paghatag og labing taas nga sumbanan sa pag-atiman sa kahimsog.///(Glenn Ray Roluna)