CONGRESSMAN ANDO OAMINAL LAKIP ANG UBAN PA NGA MGA MAGBABALAOD MIPASAR UG RESOLOSYON NGA PAIMBISTIGAHAN ANG PAGPAMUSIL NI NEGROS ORIENTAL GOVERNOR ROEL DEGAMO

Gipaiimbestigahan na usab sa House of Representatives ang kasong pagpatay kang Negros Oriental Gov. Roel Degamo.

Pipila ka mga magbabalaud ang miduso ug resolusyon para imbestigahan ang pagpatay sa gobernador.

Kini ang House Resolution No. 825 nga gipangamahanan nila ni Reps. Jefferson Khonghun (Zambales); Sancho Fernando Oaminal (Misamis Occidental); Marie Bernadette Escudero (Sorsogon); Francisco Paolo Ortega (La Union); ug Midy Cua (Quirino).

Si Degamo gibanhigan sulod mismo sa iyang compound sa Barangay San Isidro, Sitio Nuebe Pamplona, kung diin natunong nanghatag siya ug ayuda.

Sa nasangpit nga pagpamusil siyam ang namatay lakip ang gobernador.

Tumong sa mga magbabalaud sa pagsang-at ug resolusyon aron mahunong na ang mga kaso sa pagpatay ug pag-atake sa mga politiko.

Gusto sa mga Kongresista nga adunay himoong lawom nga imbestigasyon, ug masuta usab ang mga posibleng motibo sa mga kreminal.///(MNN)