PSA REGIONAL DIRECTOR PERSONAL NGA NANGAYO UG DISPENSA KANG MAYOR INDY SA AKSYON NGA GIHIMO NI MIS. OCC. PSA HEAD LIZA BIGORNIA

 

Personal nga nangayo ug pasaylo si Philippine Statistics Authority (PSA) Chief Statistical Specialist ug OIC sa Region 10, Janith C. Aves, kang Mayor Indy Oaminal, human niini madawat ang report sa pagsupak sa PSA Misamis Occidental Provincial Head, Ma. Liza Bigornia sa ordinansa sa syudad. Mahinumduman nga gipugos ug pagpahigayon ni Bigornia sa dakbayan ang usa ka Data Dissemination Forum, nga walay gikuha nga permit gikan sa local government. Gani, nagsinggit-singgit pa si Bigornia sa mga LGU representatives nga miadto sa venue ug mihangyo kaniya sa pagsunod sa City Ordinance No. 1240-2022. Apan, gisyagit lamang ni Bigornia nga isip national agency, ang PSA dili kini mapugngan sa mga lokal nga balaod.

Gitul-id kini ni PSA Regional Head Aves ug giklaro nga ang PSA nagatuman sa tanang balaod apil ang lokal. Sa sulat ngadto kang Mayor Indy, gipasabot ni RD Aves ang sinsero nga pagpangayo ug pasaylo tungod sa kagubot nga miresulta tungod sa aksyon ni Bigornia. Gipasabot ni RD Aves nga dili polisiya sa PSA ang pagsupak sa mga balaod o ordinansa sa pagpahigayon sa bisan unsa nga mga kalihukan sa ahensya. Sumala pa niya, “All PSA employees are instructed to follow all laws, protocols and ordinances, may these be national, regional or local.”

Mipasalig usab si RD Aves nga hisgutan uban kang Bigornia ang maong hitabo ug pahinumdoman kini sa pagsunod ug pagtahod sa mga local laws ug ordinansa nga gipatuman sa dakbayan sa Ozamiz.

Kahinumdoman nga pormal nang gipasakahan ug kaso sa LGU Ozamiz si Misamis Occidental PSA head Bigornia human kini mipugos sa pagpahigayon sa usa ka activity sa Ozamiz City bisan walay permit sa LGU. Ang Ordinance No. 1240-2022 sa Ozamiz City nag-require sa mga Government Owned and/or Controlled Corporations (GOCCs) ug mga private entities sa pagkonsulta ug pagkuha sa approval sa local government una pa mopahigayon sa mga national activities, projects and programs sulod sa hurisdiksyon sa dakbayan. Kini nag-implementar lamang sa Local Government Code of 1992, nga nagmando sa mga national agencies nga mokonsulta ug mananghid sa lokal nga pangagamhanan adiser magsugod sa ilang mga proyekto, programa ug mga kalihukan. Ang mosupak niini nga ordinansa pwede nga masilutan ug mabilanggo base sa gimbut-an sa huwes.(AONC)